تعددت الأماكن والغباء واحد (1-4)

الزمان: يوم السبت الساعة الثامنة والنصف صباحاً

المكان: وزارة التجارة – مدينة الرياض

الغرض: فتح سجل تجاري

الحدث: بعد وصولي لقسم السجلات التجارية الخالي من الموظفين والمليء بالمراجعين (الدوام الرسمي يبدأ الساعة السابعة) ، بحثت عن رقم عشان اخذ دوري لكن ماحصلت !! بحثت عن موظف ولكني ايضا لم ماحصلت الا رجل امن، سألته: من وين آخذ رقم؟ قال من عندي انا، قلت طيب ممكن تتكرم علي بواحد؟، قال “معصي” خلصت الارقام !!!!!! كيف خلصت والموظفين اصلاً مابعد شرفوا ؟ !! قال عاد خلصت وهذا اللي صار !! تكرم علي احد المراجعين وقال لازم تكون هنا من الساعة سته الصباح عشان تقدر تاخذ رقم. وفعلاً في الغد جيت الساعة سته وحصلت تقريبا 100 شخص واقفين في طابور طويل

و15 شخص آخر جالسين في جلسات متفرقة، اللي ياكل فول ، واللي يغط خبز تميس في شاهي ، قعدت اطالعهم بإستغراب!! لاحظني واحد جالس ومعه سندوتشات (جمع ساندوتش:) ) ثم مد لي وحده وقال ..تبي؟ .. انطح فالك!! .. هربت منه وانا اقول لا لا شكرا 🙂 وتعكرفت في واحد منضجع على جنبه .. قام وفك اللطمة وقال ياخوي انتم ماتخلون احد يرتاح في حياته؟ جاي من بيتكم ومخلي ذا العالم كلهم ومتعكرف فيني انا؟ خلونا ننام قبل لايجينا الدور!! قلت آسف آسف ماشفتك واكملت هروبي !! وطبعاً البرقراف الازرق هذا فيلم من تأليفي و إخراجي 🙂

.. المهم احد المراجعين جزاه الله خير تطوع وسجل اسماء المراجعين بالترتيب وسجلت معهم، الساعة سبعه الصباح شرف رجل الامن واخذ سجل الاسماء من المراجع وصرف ارقام للحضور على حسب الترتيب ، ينادي كل واحد بإسمه ذكرني بايام المدرسة !!

الساعة 8:55 الصباح شرف اول الموظفين (الدوام متى يبدا ؟ الساعة 7) واخذ يخلص اجراءات استخراج السجل لأول مراجع ولاحظت انه كان يدور اي نقص او خطأ حتى يرد المراجع، يعني كأن شغلته تطفيش خلق الله !! رد اكثر من مراجع وتهاوش مع مراجعين آخرين، لما جات الساعة 9:30 جاء موظف ثاني ليكمل مسيرة التدقيق والتطفيش، وصل دوري الساعة 10:30 اخذ الموظف بتدقيق الاوراق تدقيق دقيق 🙂 ووجد ضالته، احد الاوراق التافهه غير موجوده … قال وين الورقة ياحشرة؟ قعدت ادور من هنا ومن هنا مالقيتها …ورمى الاوراق علي وقال كمل اوراقك اول ياحشرة ثم تعال طلع سجل تجاري، حاولت من هنا ومن هنا .. مافيه فايدة ، قلت بالله احفظ وجهي بكرا راح اجيك بالورقة وانهي الاجراءات بدون رقم لانه مابقى لي شي وحرام اعيد نفس الخطوات الغبية عشان ورقة ناقصة، قال من زين وجهك عشان احفظه؟ معصي،.. ياحشرة .. بكرا تجيني بدون رقم راح اقولك ضف وجهك .. قلت الشرهه ماهي عليك ، الشرهه على الحمار اللي اسس نظام الارقام الغبي هذا اللي يخلص قبل مايداوم الموظفين!!، فيه اختراع يسمونه فتح مكاتب في مناطق مختلفه، وفيه اختراه يسمونه الحكومة الالكترونية، وفيه اختراع يسمونه مراقبة ومحاسبة الموظفين وفيه اختراع يسمونه زيادة عدد الموظفين، لكن انتم وين وذا الاختراعات وين !! قال اقول عطنا مقفاك … يللا الحشرة اللي بعده؟

طبعاً من تعابير وجهه متأكد انه ماكان يشوفنا الا حشرات

النتيجة: ايش لك بالتجارة يابونعيلة ! .. كل تبن وعيش باقي حياتك موظف اهبل، وفي اخر الشهر اقبض راتبك وخلص عليه خلال خمس ايام ، وهكذا دواليك .. والسجل التجاري نفتحه في الجنة ان شاء الله لأن مثل مايقولون .. لهم الدنيا ولنا الآخره 🙂

يتبع في اماكن الغباء الاخرى (مستشفى دلة ،الجوازات، الخطوط السعودية)

Advertisements

11 تعليق

  1. ههههههههههههههههههههههه

    والله انك مصرقع

    طيب كان قلت لي وانا اضبطك اروحك لواحد هناك ويخلص امورك يعني تجهلك ذا الديره ماعندك واسطه يمرمطونك يعني (……………………)

    هوايتي وزارة التجاره بحكم شغلي اللي ماستفدت منهم الا لهط الدراهم في كل شي لو تقول اء قالوا رسوم.

    سجل ،شهادة منشأ، غرفه تجاريه .لهط في لهط(وقال ايش مافيه ضرائب) كله كوم وإعلان في جريدة ام القرى (اي شي)

  2. صدقني مستعد أنتظر و أتنازل عن كثير من الأخطاء لو كان الموظف يعاملني بـ احترام و بـ أدب ..!

    لكن (شين) و قوي (عين) !!

  3. إسلوب رائع فـ الكتابة ،،
    أسمع قصص إخواني ومشاكلهم مع المراكز التجارية هذي ،،
    ما أدري لمتى راح نظل كذا ،،
    الله المستعان

  4. أضيف لك أماكن غباء أخرى ( جامعاتنا وَ خبصة التخرج , الوظايف المديرية بجهه و الوزارة بجهه أخرى , الإبتعاث وزارة الصحة بجهه وَ إدارة التدريب و الإبتعاث بجهه ثانيه .. إلخ ) القائمة تطول وَ نحن لا نزال في قائمة الإنتظار
    دمت بخير

  5. “امعصي”
    ” احد المراجعين جزاه الله خير تطوع وسجل اسماء المراجعين بالترتيب وسجلت معهم،”
    “يا حشرة”

    شلك بالتجارة ودوخة الراس يا……………………………….تميم ياخوي

  6. رائد

    ما تقصر والله … بس تعرف حبيت اشعر بشعور الرعية ………. ههههههه
    اما الاعلان في جريدة ام القرى هو اللي عجزت افهمه؟ يعني ماقد شفت احد يقراها ولا قد شفت الجردية في اي بقالة !

    @@@

    محمد المغلوث

    المشكلة انهم جمعوا الاثنين وزادوا عليها حبتين غباء !!

    @@@

    عابرة
    يبيلهم واحد ينفضهم نفض
    شكرا لك

    @@@

  7. Light
    الله يصبرنا

    @@@

    غانم
    خلاص هونا 🙂

  8. “والسجل التجاري نفتحه في الجنة ان شاء الله لأن مثل مايقولون .. لهم الدنيا ولنا الآخره ”
    يقول المثل:
    القناعة كنغر أسترالي |:

  9. ههههههههههههههههه…..الله يقطع ابليسك ….مسوي فيه تاجر ….وفي الاخير تعقدت ….اكره شى على قلبي مراجعة اي دائرة حكومية….لاني في الاخير احس اني وسط عالم متخلفة ….الناس تتقدم وحنا مكانك سر….معليش تكبر وتنسى

  10. انت الغلطان
    طول ما أنت في مملكة الانسانية لازم تكون فاهم الوضع زين؛ مو بذنبهم أنك مواطن مب صالح
    الدائرة الحكومية من اسمها “دائرة” يعني هم قايل لك من أول انك تدوووور وتدووووور وما تصل لنقطة نهاية .. هذا اللي اسمه “وضوح” و “شفافية”
    لازم قبل ما تشتري الملف تشوف لك واسطة تخلي الطريق “سيدا” وما تصير ذكي أكثر من معاليه.

  11. آخ آخ .. لو مايجيك من وزارة التجارة ألا مبناهم الي ماادري وش يبي !

    تحس لو بترمي عليه حصاة طاح !

    والله كل مامريت عنده الصباح وانا رايحة للجامعة .. اقعد ابحلق فيه .. صدق هذي وزارة !! لاا يمزحون !!

    واذا على المعاملة .. ثلاث أرباع موظفين الدوائر الحكومية للأسف كذا .. مو الراتب جاي جاي .. ولا أحد يقدر يزحزحه من مكانه ! .. ماراح يتعب نفسه ! ..

    شكراً تميم ..

    نورة ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: